Bantay Kurapsyon: Love Gift sa DENR (2)
Kumusta na ang Love Gift sa CENRO-DENR? Aduna pa ba?
Bantay Kurapsyon: An award-winning anti-corruption campaign by Paul Pastrano Gangoso
Ang “Love Gift” sa DENR mao kanang ginapanigil sa CENRO isip bayad sa pag-proseso sa permit to transport sa imong mga kahoy nga giputol. Kasagaraan sa mokuha niining permit mao kadtong mga operators ug bansohan. Sakop sa CENRO- Oroquieta ang tibuok District 1 sa Misamis Occidental. Ug niini, ubay-ubay ang ma-kickback sa maong opisina gikan niining operators.
Supak kini sa baload ang maong pagpangilkil sa CENRO-DENR ngadto sa katawhan. Misupak kini sa probisyon sa Code of Conduct and Ethical Standards of Government Employees and Officials, ingon usab sa Anti-Graft and Corrupt Practices Act. Kasong kriminal ug administratibo ang mamahimong atubangon niining mga walay ulaw nga opisyales sa atong kagamhanan. Niini, mamahimong tangtangon sila sa pagpanebisyo, mapriso ug mamultahan.
Nganong anaa man kining “Love Gift”? Kitang mga yanong katawhan ang usa sa hinungdan niining pangurakot nga binuhatan sa CENRO. Gusto kita nga dali-dalion ang mga papeles ug dili sundon ang normal nga proseso sa opisina. Aron mapugos nato ug padali ang atong papeles, nagasuhol kita sa mga empleyado sa maong institusyon. Dala ka kalisod, boluntaryong ginasunod sa moang mga empleyado ang gusto natong mahitabo bisan pa kini pagsupak sa ilang pamalaod ug palisiya. Kani nga binuhatan ato nang nadala ug nahiumol na sa atong kultura. Isip resulta, nahimo na nga sistema kini sa atong inadlaw-adlaw nga panghitabo sa bisan unsang ahensya sa gobyerno. Ang pagwagtang niining sayop nga gawi nagakinahanglan ug pagbag-o sa atong naandang kultura ug pagrespito sa proseso sa pagkuha ug papeles sa kagamhanan.
Apan, guwas pa sa atong kontirbusyon sa maong sayop nga kultura, aduna gayud pud pipila ka opisyales sa kagamhanan nga walay ulaw nga mopakaon sa ilang mga anak ug kwartang gikan sa pangurakot. Daw susama sa usa ka buaya nga bisan unsay anaa sa atubang kaonon basto gigutom. Susama nalang niining opisyal sa CENRO-DENR. Samtang tarong nga naginabuhi ang ubang empleyado sa iyang opisina, kani nga opisyal nagpadako ug samot sa iyang bulsa pinaagi sa pagsangyaw sa “Love Gift”. Usa ka libo ang bayad kada pirma niya. Pila kaha ang bayad sa pirma sa gaba nga moabot sa tawong mapahimuslanon ug abusado sa gahom? Wala.
Loading...